കൊൽക്കത്ത ∙ സിഗരറ്റ് വലിക്കുന്നതിനിടെ ദേശീയഗാനത്തെയും പതാകയെയും അവഹേളിക്കുന്ന പെൺകുട്ടികളുടെ വിഡിയോയെച്ചൊല്ലി വിവാദം. ദേശീയഗാനത്തെ പരിഹസിക്കുകയും സിഗരറ്റിനോട് താരതമ്യം ചെയ്യുകയും ചെയ്യുന്ന തരത്തിലുള്ള വിഡിയോയാണ് പെൺകുട്ടികൾ ഫെയ്സ്ബുക്കിൽ പങ്കുവച്ചത്.

വരികൾ തെറ്റിച്ചാണ് ദേശീയഗാനം ആലപിക്കുന്നതും. സമൂഹമാധ്യമത്തിൽ ഇവർക്കെതിരെ രൂക്ഷ വിമർശനമാണ്. കർശന നടപടി ആവശ്യപ്പെട്ട് നിരവധിപേർ രംഗത്തെത്തി. വിവാദമായതോടെ സമൂഹമാധ്യമ അക്കൗണ്ട് ഡിലീറ്റ് ചെയ്ത് തടിതപ്പാനുള്ള ശ്രമത്തിലാണ് പെണ്‍കുട്ടികള്‍.

നടപടി ആവശ്യപ്പെട്ട് അഭിഭാഷകൻ അത്രായി ഹാൽദർ ലാൽബസാർ സൈബർ സെല്ലിലും ബാരക്പുർ കമ്മിഷണറേറ്റിലും പരാതി നൽകിയതായി റിപ്പോർട്ടുണ്ട്. തമാശയ്ക്കു വേണ്ടിയാണ് ഇത്തരത്തിലൊരു വിഡിയോ ഉണ്ടാക്കിയതെന്നാണ് പെൺകുട്ടികളുടെ വിശദീകരണം. പെൺകുട്ടികൾ പ്രായപൂർത്തിയാകാത്തവരാണെന്നും റിപ്പോർട്ടുണ്ട്. അന്വേഷണം നടക്കുന്നതായി പൊലീസ് അറിയിച്ചു.